Li Tirkiye û Bakurê Kurdistanê berî "pirsgirêka kurd", helbet "pirsgirêka tirk" heye ku qet behsa wê nayê kirin.
Ev pirsgirêka tirk ji rihê "yek dewlet, yek milet, yek al, yek ziman, yek mizgeft, yek dîn, yekkkkk..."ê peyda bûye û niha bûye belayê serê hemû Rojhilata Navîn û Ewropayê.
Heke ji vê pirsgirêka tirk re çareyeke maqûl bê dîtin, hingê kurd û doza wan jî di çav û rihê civaka tirk û dinyayê de êdî nabe "pirsgirêkek"...
Jixwe "pirsgirêka kurd" jî ji wê geremol û faşîzma "pirsgirêka tirk" derketiye û di rihê 29 serhildanên kurd de heta çiyayên Kurdistanê serî hildiya.
Hemû girtin, kuştin, mirin, dek û dolab, dizî, xapandin ji hebûna vê "pirsgirêka tirk" dadiwere ser rûyê civaka kurd û tirk.
Çend nîşaneyên pirsgirêka tirk yên modern wiha ne:
- Qêrîna daxwaz, xwestek û xwepêşandan yên ji bo civaka ereb dibe "bihar", lê heman xwestek ji bo civaka kurd dibe "KCK, girtin û zindan..."
- Serîhildan û redkirina sîstemê ji bo civaka ereb dibe "azadî", lê heman xwestek ji bo civaka kurd dibe "terorîst, bombe, goristan..."
- Her tiştên xwezayî ji bo tirkên li Qibris û Almanyayê dibe "mafê mirovan", lê heman tişt ji bo civaka kurd dibe "bolûcû, eşqiya, bunlar daha ne istiyor..."(cûdaxwaz, serhildêr/eşqiya, ev êdî çi dixwazin...)
- .......û hwd...
Melayên TRT 6'ê
Mixabin faşîstên ku dibêjin "bunlar daha ne istiyor" -ku hejmara wan bi mîlyonan in- hê jî dixwazin ku civaka kurd her bîst salan bi "TRT 6"ekê ve destê wan maçî bikin û wekî melayên di TRT 6ê de li pey wan "nimêj" bikin û duayan -bi kurdî be jî- li bavûkalên Osmaniyan bibarînin.
Loma ez dibêjim heta ku Pirsgirêka Tirk neyê çareserkirin, heta çareyeke maqûl jê re neyê dîtin, wê doza kurd û Kurdistanê jî her wekî "pirsgirêk" bimîne û wê bimîne li benda çareseriyekê.
Mixabin zarokên kurd û tirkan jî wê bibin qurbaniyên vê "pirsgirêka tirk" heta ku çareyeke maqûl jê re hate dîtin.
Hiç yorum yok:
Yorum Gönder