Dewlet, medya û rewşenbîriya tirk gelek têgeh/gotin bi zanahî di nav
siyaset, medya û rewşenbîriya kurdî de şêlo kirine û li gorî
berjewendiyên xwe wateya wan ji nû ve guhertine.
Yek ji wan têgehan jî "Neteweperest" e.
Weke ku tê zanîn wateya "neteweperest"ê ew e ku kesên hemû heyîn û
hebûna miletê xwe diparêzin, pêş dixin û ji bo vê yekê li gorî qewata
xwe kar û xebatê dikin.
Lê helbet "neteweperestî" ne ew e ku kesek li dijî neteweyeke din be;
jixwe dema kesek/sîstemek li dijî neteweyeke din be, hingê "faşîzm"
dest pê dike; li Almanyaya Naziyan wiha bû û niha jî li ba "nazî"yên
sîstema Dewleta Tirk wiha ye.
Ji ber ku Dewleta Tirk di bin navê "neteweperestî"yê de li dijî hebûna
gelê kurd "nazî"tiyê dike; loma hemû kar û xebata kurdan ya ji bo
azadiya „Kurd, Kurdî û Kurdistanê“ jî di bin navê "neteweperestî"yê zûka
reş dike û bi manûpilasyonên post-kemalîst ve aqilê siyaset û
rewşenbîriya kurdî zûka belawela dike.
***
"Heke kesek neteweperest be..."
Li gorî fikra min, heke kesek neteweperest be, yanî heke kesek heyîn û
hebûna miletê xwe biparêze, heke kesek wekî heyîneke çandî netewa xwe
nas bike, hebûna xwe bijî, nasnameya xwe xurt bike; hingê dikare bêtir
neteweyên din jî nas û hez bike; û bêtir dikare hurmet û empatiyê li
dijî kes û neteweyên din jî bigire.
Ji xwe bi vê naskirin, hezkirin, hurmet û empatî-grêdanê ve jî "nasnameya me ya dinyayî" dertê holê.
Heke kesek serê pêşîn xwedêgiravî "insan" be, lê qet ji neteweya xwe hez
neke û ji bo bidestxistina mafên bingehîn yên neteweya xwe têkoşîn
nede, gelo dê çi feydeya wî/ê bigihîje dinyaya mirovatiyê?!..
Mixabin piraniya dewlet, medya û rewşenbîriya tirk di bin navê
"neteweperestiyê" de li dijî nasname, heyîn û hebûna "ên din"
post-faşîzaniyeke eşkere dike; di bin navê "neteweperestiyê" de hemû rê û
rêbazên hov ji xwe re helal dike.
Lê hemû têkoşîn, kar û xebata insanî ya ji bo azadiya "Kurd, Kurdî û
Kurdistanê" jî di bin navê "neteweperestiyê" de bi gelek rê û rêbazên
faşîzane ve heram dike.
***
"Heke miletê kurd piçekî neteweperest bûya…"
Ne hewce ye ku ez bi gelek teoriyên qerase ve vê nivîsê dirêj bikim; hema yekser bibêjim:
Heke miletê tirk(erê tirk!!!) piçekî jî neteweperest bûya; yanî heke
medya û rewşenbîriya tirk hez ji ziman, çand û hebûna xwe bikira; niha
sedîsed dê hurmetê ji çand û hebûna miletê kurd re jî bigirtana.
An jî; heke miletê kurd piçekî neteweperest bûya; heke piraniya partî, rêxistin û rewşenbîriya kurd neteweperest bûna;
Niha hebûna „Kurd, Kurdî û Kurdistanê“ di bin lingê dewlet, medya û rewşenbîriya tirk de ewçend nediperçiqiya…
Niha partiyên tirk ewçend deng ji kurdan wernedigirtin…
Niha hemû heyîna Dewleta Tirk ya li Bakur di bin komkujiyên "Roboskî, Dêrsim, Newala Qesaban, Zîlan û hwd." de mabû.
Niha rewşenbîr, hunermend û medyaya kurd ji bo "erêkirin û aferîmekê" li devê medya û rewşenbîriya tirk mêze nedikir.
Niha "xulam"ên kurd di piziya dewlet û partiyên tirk de ewçend zêde nedibûn…
Niha xwe-asîmîlasyon, jixwedûrketin, xwe-ne-nasî û hwd. di nav civaka kurd de bûbû qibheteke mezin.
***
"Neteweperestî ne baş e yawww heval!"
Bi xêra aqilê kemalîstan hin kurdên "welatparêz" jî car caran wiha dibêjin, "Neteweperestî ne baş e yawww heval!"
Tu bi telefonê bi diya xwe re diaxivî(helbet bi kurdî!), tu doza
pîvazeke kurdî dikî, tu dixwazî ku saziya te bibe Kurdistanî, tu
bersiveke kurdî didî tirkiya şaredarê/a xwe, tu fonetîka tirkî di nav
dengê hunermenda/ê kurd de zeft dikî, tu ji acizî ji bêhemdî xwe çêr û
nifirên malneketî ji dagirkerekî re dikî; hingê sedîsed tirkek (lê gelek
caran jî kurd bixwe!) ji te re wiha dibêjin, "Neteweperestî ne baş e
yawww heval!"
Heke ji hişê biwêjeke kurdî fêm bikiran, wekî bersivekê me yê „Tir li ku, das li ku“ bi mejiyê wan yê kemalîst ve daliqandana, lê mixabin heta tu bi tirkî nebêjî ji vê jî fêm nakin.
Axir, bila koxikeke kurdan ya azad çêbe, bila hingê hemû kurd jî bêjin, "Neteweperestî ne baş e yawww heval!"
Lê heta ku koxikê "Kurd, Kurdî û Kurdistan"ê azad bibe, divê li ser milê her kurdî ferz be ku piçekî "neteweperest" be.
Piştî hingê jixwe em ê li „tir û das“ê hev binêrin.
***
Gotina min ya dawî jî ji "dîwar"ên Kurdistanê re ye:
Şev nîvê şevê piçekî dermanê neteweperestiya Kurdistanê "bixin" berîka
her kurdî; şeveqê rabin, hûn ê bibînin ku azadiya "Kurd, Kurdî û
Kurdistan" bêtir nêzîk bûye.
Dîwaro ji te re dibêjim, siyasetmedaro/ê tu fêm bike!?..
Hiç yorum yok:
Yorum Gönder