ss

Welatparêzî ji zimanparêziyê dest pê dike! Ez ne xwediyê enstîtûya welatparêzî û zimanparêziyê me. Ez ne nobedarê tu teoriyên qerase me. Di destê min de tu mohrên keskesor tune ne. Lê tişta min fêm kirî ev e: Welatparêzî ji zimanparêziyê dest pê dike. *** Wekî hin serokan nikarim tu fermanan bidim. Mîna hin rêveberan nizanim tu talîmatan pêşkêş bikim. Nola Mamê Şêx ji min nayê ku nivîştiyekê çêkim. Lê tişta min fêm kirî ev e: Welatparêzî ji zimanparêziyê dest pê dike. *** Di destê min de ala welatekî serbixwe tune ye. Li pişta min tu artêşên babegît qet tune ne. Li pişt tu rext û mertalan gotinên xwe nabêjim. Lê tişta min fêm kirî ev e: Welatparêzî ji zimanparêziyê dest pê dike. *** Ji bo azadkirina welatekî tu formûlên min yên hazir tune ne. Hevokên min yên koçerane belkî nebin ‚şîv’a nifşekî birîndar. Nizanim dê gotinên min rêya çend 'şervan'an ronî bikin. Lê tişta min fêm kirî ev e: Welatparêzî ji zimanparêziyê dest pê dike.

Evdile Koçer: Çend koçernot li ser aştî û maştiyê

Aştî jî wekî evînê ye.

Bi yek milî jî helbet "aştî" çêdibe.

Lê heta nebe du milî, ew aştî tu carî naçe serî!

Ew aştî di dawiyê de dibe "şaştî".

***

Piştî hevdîtinên li Îmraliyê, tevahiya gelê kurd tenê pirsekê ji xwe dike,
"Gelo çavê dewleta tirk dîsa li pey xapandinekê ye?!"

Hemû serkeftin û binkeftina "pêvajoya aştiyê" jî dê di nava pirsên wiha de veşartîbe!

***

Ga dimire çerm dimîne, mêr dimire nav dimîne, şer dimire aştî dimîne!

***

Yê ku di destê wî de tenê "aştî" hebe, her tiştî wekî "kevokekê" dibîne! (Min gotina Abraham Harold Maslow ya "çakuç û bizmar" piçekî guherand!)

Lê yê ku di destê wî de tenê "şer" hebe, her tiştî wekî "ne-yar"ekê dibîne!

***

"Kulav û kurtan, nok û nîsk, lihêf û balgîvên kurdan, divê nekevin nav bazariya aştiyê!" (Nanxwurê Cilqetîn)

***

Madem ku her kes behsa "aştî" û "empatî"yê dike. Bi destûra we be, ê nexwe ez ê jî hewl bibim ku dil berdim keçeke tirk!

***

Ji min re behsa aştiyekê bike, bila "Pêlavên Birîndar" ên welatê min tê de hebin!

Ji min re behsa aştiyekê bike, bila xewna Xanî, Bedirxan û Mazluman tê de hebe!

Ji min re behsa aştiyekê bike, bila dek û dolabên neviyên osmaniyan tê de tunebin ji bo Xwedê!

Ji min re behsa aştiyekê bike, bila axîn û nalîna Şêx Seîd û Seyîd Riza tê de tunebe!

Ji min re behsa aştiyekê bike, bila çiya û zozanên Kurdistanê tê de serbilind bin!

***

Xwedê vê carê "riya aştiyê" şaş neke, şaş bike kaş neke, kaş bike faş neke, faş bike lê vê carê zarokên kurd û tirkan di binî de nehêle!


Evdile Koçer
evdilekocer@yahoo.com

1 yorum:

Kaydol: Kayıt Yorumları (Atom)